contact@mohamed-kamal.com +201095160268
July 08, 2020 - بواسطة مشرف

جرعة أمل بالعكس

جرعة أمل بالعكس!!


كان نفسنا نركب قطر الحياة .. بس القطر هرب وموقفش!!


أوقات بنعيش فيها وأوقات مبنتنفسش..

الفرحة يادوب ساعة ونقضيها .. وساعات الحزن متتعدش.


دموع كتيرة في ليالينا .. وفي نهارنا نداريها متتشافش!

حزننا آه باين في عنينا .. بس احنا جامدين مبنتهزش!

سنين وسنين ياما عملت فينا .. ونقول الأيام الحلوة لسه مجاتش!

اللي نحبه يبكينا .. ونقول أصل الحلو ميكملش!


أغراب إحنا في أرضنا .. ومستكترين علينا الغربة!

عايشين بس اسمنا .. والروح من زمان حاضناها التربة!


يا دمووووع يا ألم

يا شموووع في ليل كئيب

يا حياة شبه العدم

الموت أرحم مالتعذيب


لا أمل لا أحلام

كله بقى حبر على ورق

السنين هي اللي عدت أوام

ولا العمر اللي اتسرق؟


بلاد بقت حزينة بشوارعها .. وناس تايهين ضايعين

ناس تصرخ ولا حد سامعها .. وناس فوق فوق ومش حاسين

كام واحد مسؤول حاكمينها .. وملايين البشر مساكين متساقين!


وآدي اللي بنسميها حياه 

خلصت وكل حاجة انتهت

ولا يوم حلو عشناه

ولا دموعنا من عيونا اختفت


سيبونا نمشي بقى

واكتبوا على قبرنا...

 "حاولوا أن يعيشوا، لكن أرواحهم أبت"

وهاتوا الذنب علينا... 

احنا كده كده ناس مدة صلاحيتها انتهت.. 

مدة صلاحيتها انتهت.


- محمد كمال ، خاطرة